政情：翟紹唐避談任律政司司長
特首選舉尚未揭盅，下屆政府管治班子名單已經曝光？法律界近日就盛傳，身兼資深大律師嘅監警會主席翟紹唐，會做律政司司長，仲話佢近年頻頻出任公職，包括最低工資委員會主席，連中央都留意到，講到言之鑿鑿咁。不過，翟紹唐尋日出席監警會記者會嗰陣就大賣關子，話「今日唔講呢啲嘢」喎！
雖然翟紹唐話唔講，但記者多番追問下，佢就透露最近的確有人問過佢係咪會做下屆律政司司長，問嘅人就係佢秘書，因為擔心老闆做咗官之後，自己會冇咗份工喎，講完笑後，佢就好正經話，暫時未有人搵佢做司長。記者打蛇隨棍上，問如果有人搵佢呢？佢就話，身為律師，所有假設性問題一概唔答！
另外，翟大狀尋日向大家介紹監警會新任副秘書長梅達明，原來梅Sir好猛料，之前做過警隊督察，後來去咗美國深造，又喺廉政公署做到首席調查主任，最近先至過檔監警會，相信會幫到好大忙。