特首候選人唐英年尋日又擺老婆上枱，喺三八婦女節前夕派遣太太郭妤淺上電台，代佢解釋近日熱爆全城嘅私生子女醜聞，但唐太點都唔肯透露丈夫「製造」私生子女嘅具體日期同次數。不過，提名咗唐唐嘅全國政協常委何柱國，尋日喺北京被問及有關問題時，就大爆事件係喺廿多、三十年前發生，強調唔係呢一、兩年加入政府後先發生嘅事。
何柱國又話，唐唐接連爆出嘅婚外情、僭建地下王宮同私生子女醜聞，全部都係私事，係唐唐同太太之間嘅事，唔似另一候選人梁振英涉及嘅西九及城大風波咁，係涉及公帑運用嘅公事，所以公眾同傳媒毋須對唐唐咁擔心喎。
問及唐英年應否公開私生子女身份，以免將來做咗特首後，對私生子女作出利益輸送公眾都唔知？何柱國話，唐唐依家只係選緊特首，呢個問題應該等佢真係當選咗先再解決。至於可以點解決，何柱國直言佢自己都唔知，叫大家等唐唐當選後再直接問對方喎。