政情：曾孤寒蟹宴充闊佬
煲呔曾貪婪成性經已街知巷聞，佢嘅本性其實仲係孤寒兼度縮，直頭係縮骨算爆﹗曾經喺曾貪心做財爺時做過官邸家廚、自封為「御廚」嘅大廚于燕平師傅，尋日現身一個公開場合時，大爆曾貪心孤寒、不識大體嘅瘀事。不過于師傅不念舊惡，諗住喺曾貪心下台嘅時候再請曾貪心食「無骨大閘蟹」，顯示乜嘢叫做大將之風，相信曾貪心一聽到「無骨大閘蟹」定必自慚形穢。
于師傅爆料話，有一次上海市政府送咗一箱大閘蟹畀度縮曾，於是度縮曾請咗一班朋友去官邸歎蟹，不過請還請，度縮曾指示于師傅一人只限一隻蟹，剩低落嚟嘅要留畀度縮曾送畀其他人。
大閘蟹係唔少人心頭好，試問一人一隻點夠食吖？喺朋友面前度縮曾又唔衰得，於是佢嗱嗱聲走入廚房叫于師傅諗計，題目係唔可以用多一隻大閘蟹，但大家又有用蟹煮嘅餸食。于師傅好有信心咁同度縮曾講，畀廿分鐘佢就搞掂，之後于師傅端出一味「無骨大閘蟹」畀眾賓客食，煲呔曾當堂嚇到面都青埋，食完之後氣急敗壞衝入廚房，睇吓有冇少到大閘蟹，原來于師傅煮出味道同真蟹無異嘅賽螃蟹，「無骨大閘蟹」裏面係無蟹嘅。
唐裝短打戴金鏈似撈家
我哋講過，煲呔曾用發霉月餅奉客，仲拍枱問啲月餅係邊個送嘅。我哋又聽到另一個月餅故事，就係佢將月餅放晒喺雪櫃，直至一年後收到下一年嘅月餅，佢至喺雪櫃拎番啲月餅出嚟畀下屬「享用」，于師傅話，呢啲都係珍珠都冇咁真嘅事實，煲呔曾呢個人，真係孤寒得交關。
除咗孤寒之外，原來度縮曾都幾唔識大體。話說有次度縮曾請咗位中聯辦朋友去官邸食飯，度縮曾又指示于師傅不能怠慢，然後入房裝身。裝完身出嚟，于師傅見到度縮曾身穿唐裝短打，衫上掛咗條金鏈，忍唔住問佢係咪打算咁樣見客？度縮曾死撐話件短打花咗成幾萬蚊喺中環買嘅，于師傅好率直咁同度縮曾講，話佢着到成個「蠱惑仔」或者拉黃包車師傅咁唔多好，度縮曾先肯換番套制服：西裝加煲呔。
雖然當年于師傅因為唔願意廿四小時當值而被度縮曾怒炒，但于師傅尋日話佢已經準備再煮「無骨大閘蟹」畀度縮曾食，仲暗寸度縮曾古時有「煮酒論英雄」，依家佢有「炒蛋燒特首」，不過佢乜嘢蛋都會用，只係唔用王八蛋！