中環出更：張永霖打造亞洲史丹福
香港大學轄下自資嘅明德學院尋日舉行成立典禮，去年底宣布會陸續辭去五項大學公職嘅張永霖（Linus），尋日以明德校董會主席身份出席。記得Linus話過完成埋任內啲手尾就會交棒，點知尋日佢話約滿後仲想繼續做，問佢點解「唔嫁又嫁」時，佢竟然話自己無講過唔做明德校董會主席，仲話要喺三十年內打造明德成為「亞洲史丹福」。
Linus喺典禮後話，自己無講過唔做明德校董會主席，仲話去年五月港大校委會主席梁智鴻，力勸佢幫手出任呢個位，佢諗咗幾個星期後就應承咗，話明德始終係佢搞出嚟，而且算係新職務喎。盛傳同Linus不和嘅港大校長徐立之都有出席典禮，兩人全程似乎無乜交流，但Linus就堅稱佢哋無不和，仲話徐立之好贊成成立明德，將自資學位獨立運作。
明德學院九月會開辦會計同文學士兩個自資學位課程，大概招收七至八百名學生，係全港唯一一間推「通博教育」嘅自資院校，課程係咪最獨特就唔知喇，但肯定係全港最貴嘅本地自資學士課程，一年級同三年級嘅學費分別高達每年八萬二及九萬二千港元。
劉允怡接掌醫委會
講開又講，尋日醫務委員會都選出新主席，中文大學醫學院「肝膽胰外科權威」劉允怡喺無對手之下當選，接替擔任主席多年嘅麥列菲菲，任期三年。麥列菲菲則會繼續擔任醫委會成員。