中環出更：中山僑商會飄色慶101周年
成立一百零一年嘅中山僑商會，尋晚喺會展舉行周年晚宴，唔少鄉親都去撐場，就連並非中山人嘅鄉議局副主席林偉強都畀面出席。
林偉強讓緋聞就此過去
早前林偉強愛女捲入特首候選人唐英年嘅婚外情緋聞，作為爸爸嘅佢不斷幫囡囡解圍，佢尋日就話依家已經冇嘢喇，讓過去嘅就此過去喎。
晚宴以長洲飄色為主題，會長林潔聲話，飄色唔單止可以喺長洲睇到，原來中山都有，所以特登帶到晚宴會場畀大家欣賞。佢仲話，一般商會社團多數慶祝以「十」為整數嘅周年紀念，但該會就較重視「一」，因為係代表新開始喎。
當晚出席嘅鄉親仲有金至尊數碼行政總裁吳傑莊（Johnny），佢年前創立咗中山青年協會，帶埋一班兄弟姊妹去湊熱鬧。Johnny話，希望積極凝聚中山年輕一代，為家鄉作貢獻。
卓妮仲見到恒興業集團董事趙曾學韞（Alice），佢係中山古鎮人。Alice話，唔好睇古鎮呢個地方冇乜名氣，其實係有「燈都」美譽，中國超過六成水晶燈都係出自古鎮。
Alice喺家鄉暫時未有生意投資，但現職栢基國際幼稚園校監嘅佢，打算明年九月喺中山開一間國際幼稚園，將香港廿多年管理幼稚園模式擴展到當地。
卓妮