中港矛盾日益嚴重，我話你係蝗蟲你話我係狗，點解會咁嘅呢？其實講來講去就係資源問題，香港一個咁細嘅地方，梗係冇辦法招呼咁多國內同胞搶呢樣搶嗰樣o架啦，尤其係雙非孕婦搶奪本地媽媽嘅應有權益，由產房床位一路搶到讀書學位，人民內部矛盾自自然然就會產生。
內地雙非孕婦有時唔係人咁品o架，未經預約都夠膽死臨盆在即先至衝去醫院急症室，搞到自己有機會一屍兩命都算嘞，分分鐘害到醫護人員冇時間照顧其他有急切需要嘅病人。所以話啫，衝急症室呢家嘢真係有必要杜絕。
話時話，雙非孕婦係透過乜嘢途徑衝急症室o架？尋日喎，立法會財委會召開特別會議，保安局局長李少光表示，經過調查之後發現，去年大約五成未經預約衝急症室嘅內地孕婦，乘坐來港嘅係掛有中港車牌嘅車輛。保安局現時已掌握有關車輛嘅資料，再入境之時會被檢查。保安局仲會將有關車輛嘅資料交畀廣東省政府，有可能實行除牌制度。
掛有中港車牌嘅車輛會唔會係屬於中介公司嘅呢？李少光就話嘞，對於中介公司協助內地孕婦來港產子，已將所掌握嘅公司名單交畀廣東省。李局長同內地官員傾過，獲覆對方會嚴肅處理，而且已立案調查多間中介公司。
呢嗱嗱嗱，香港人擔心粵港自駕遊後患無窮，隨時車毀人亡，並唔係自己嚇自己嘅杞人憂天。家陣已經有五成衝關產子個案係透過掛有中港車牌嘅車輛來港，內地司機南下自駕遊一旦推出，情況唔使問阿桂，百分百肯定變本加厲。你知啦，炎黃子孫腦筋轉得好快o架，你一話開放邊境，功夫茶敢寫包單，雙非孕婦就會變成人肉速遞，源源不絕運送來港。
除咗造就雙非孕婦衝關，自駕遊其實仲有好鬼死多問題。首先係內地司機人生路不熟，加上交通規則截然不同，一個唔覺意逆線行車都有之，交通意外數字上升唔會係意料之外。其次係文化差異，內地司機發生車禍不顧而去都已經唔算大鑊，最大鑊嘅係「寧撞死不撞傷」嘅駕駛態度，甚至落車向傷者連捅八刀確保必死無疑。仲有係執法困難，試問香港警察何德何能踩上大陸緝拿違規司機？
即係咁，自駕遊助長內地孕婦衝關，雙非嬰勢必加劇中港矛盾，蝗蟲與狗更加水火不容。既然問題一籮籮，特區政府冇理由一意孤行推出自駕遊啫。弊就弊在，家陣呢一個曾蔭權集團已經氣若游絲，醜聞多多又即將收工。所以咯喎，功夫茶將希望寄託於幾位特首候選人，麻煩閣下嘅競選承諾加多兩項：煞停自駕遊，杜絕雙非嬰！