最近又有立法會議員爆料，話吸取過歷史教訓後，覺得不記名投票呢樣嘢根本唔存在，隨住科技進步，一定可以派人遠距離偷拍投票過程喎。
立法會財委會特別會議原本只可以討論撥款問題，不過依家啲議員言論咁自由，早就超越晒呢啲界限。喺尋日政制及內地事務局局長譚志源出席嘅環節，議員提到特首選舉投票，話好容易畀人發現投咗邊個一票。
譚志源喺會上大派定心丸，話三月廿五日嘅特首選舉，所有投票人士都唔可以帶電子儀器入場，再加上班選委喺指定時間內投票，唔使排隊，張選票亦好細張，所以無咩可能用肉眼睇到前面嗰位投咗咩票，叫議員放心喎。
不過要追蹤小圈子選舉邊個投咗票畀邊個，數下手指就得，都唔使乜嘢高科技。