政情：郭位唔好炒樓寧缺宅
樓市又爆小陽春，升勢是否虛火，專家都話睇唔通。揸到香港樓就好似點都唔使執輸，不過城大校長郭位至今仍是「缺宅一族」，無樓喺身。
郭校長○八年來港上任做城大校長，年薪唔低，夠晒條件上車。不過尋日現身馬場盃賽，佢自爆仍住喺城大提供嘅宿舍，無樓揸手。莫非校長對香港樓市無信心。非也，郭校長話，佢家在台北多年，仍未嘗做業主滋味，理由係自己工作太忙，不時周遊列國，睇樓都唔得閒。佢笑言，生活只求有瓦遮頭，無諗過要買樓致富。
郭位仲話，港人熱衷嘅炒股遊戲，都唔啱佢，事關無時間刨股經。佢尋日應邀入馬場，只落注四十元買「位置」，聽落幾保守。校長話，佢讀書時研究「或然率」，發現買馬遊戲其實輸多贏少。幸好尋日眼光準確，贏咗八十幾元，算有交代嘞。