政情：肥平吹捧雷鋒過火位
兩會期間，港區人大同政協喺北京見到內地媒體時，都會講啲啱聽嘅說話，同內地文化睇齊，但係分寸就唔係咁容易拿捏。好似全國政協委員何志平咁，佢接受內地記者訪問時話，應該將雷鋒精神全球化，仲話雷鋒個人已經超越「肉身嘅個體」，成為眾人集體符號。今勻佢真係過晒火喎。
雷鋒精神近期喺大陸有「翻生」迹象，點樣向雷鋒學習、點樣推廣，都成為內地坊間熱話，可能肥平見有位可入，即刻喺內地記者面前猛咁吹捧雷鋒。佢話任何一個中國人都係雷鋒。做醫生救人可以係雷鋒、汶川地震後去災區嘅熱心人都可以係雷鋒，總之雷鋒係完美嘅無產階級戰士啦。
肥平仲話，中國唔同時期都有雷鋒精神代表，好似漢代有張騫、明代有鄭和，近代就雷鋒，所以應該將「雷鋒精神」全球化，推廣至全球每一個角落。擦鞋擦到咁無分寸，唔知肥平講呢番說話時有無面紅呢？