中環出更：私人機熱爆 葉家麟瞓身推銷
私人飛機最近成為熱門話題，隨着內地崛起富商激增，加上香港進口私人飛機的免稅安排，採購私人飛機，成為熱爆商機。身為富豪二代嘅葉家麟（Albert），近日亦加入行列，更獲城中武打巨星「託管」其巴西航空Legacy 650豪華飛機。
學會富豪思維
出身於英國名牌大學法律系，Albert父親係藍帶啤酒亞洲區總代理葉振南，原本衣食無憂，但佢寧願加入私人飛機公司SinoJet，由低做起，天天向有錢人推銷，學會富豪嘅思維方式：「佢哋畀得起錢買飛機，唔太介意價錢，多一個億，少一個億，唔係問題。安全第一，至係最重要。」說穿了，就是猜透富豪的腦袋，知道佢哋諗緊乜。例如，買飛機是為了度假，還是商務；飛長途，還是短途多？
機種五花八門，富豪熱捧嘅飛機，要數美國灣流航太公司出品嘅Gulfstream G550，機價約三千五百萬美元，即二億幾港幣，聽聞恒基主席李兆基、微軟巨子蓋茨，及富士康集團總裁郭台銘都分別有一架；旺旺集團董事長蔡衍明則擁有Gulfstream G200，同樣身價不菲，但Albert話，近年二手飛機有價有市，想買一部「入門版」，約八千多萬港元也有交易。
豪裝飛機也成為熱潮，有富豪安裝寬敞大床、私人影院、麻雀枱、大鋼琴外，就連安全帶扣，亦要求用上純黃金。正因為富人講究，新機抵港驗收時，不能只靠「目測」，SinoJet執行總裁劉暢坦言，單是飛機外殼，佢會用雙手從頭到尾摸一次，確保沒有三尖八角，才交畀客人。富豪錢，其實唔易賺。
卓妮