三月五日星期一，中國曆法正正係二十四節氣之一嘅驚蟄。你知啦，驚蟄最應節嘅活動就係打小人，熱門刑場係灣仔鵝頸橋，常用刑具係神婆嘅拖鞋，今年最適合施展拖鞋神功狠狠打一打嘅小人係邊個呢？有人話係情敵，有人話係上司，不過如果你撇開兒女私情同職場恩怨，改為以大局為重，此時此刻最該打嘅小人非曾蔭權莫屬。
冇錯嘞，煲呔曾絕對係最該打嘅頭號小人，事關呢一個「香港第一貪官」激發全港市民義憤填膺，唔打真係難洩心頭之恨。曾蔭權名副其實臨尾香，距離夠鐘落台只有四個月之嘛，居然被揭發連串貪腐醜聞，又官商勾結啦，又利益輸送啦，海陸空大小便宜貪到盡。
更加可惡嘅係，即使立法會議員群情洶湧展開公審大會，哈，臉皮厚到冇人有嘅曾濫權居然拒絕引咎辭職。佢話喎，唔可以隨便離開崗位，以免影響政府運作。其實計功夫茶話齋，貪婪小人賴死唔走先至影響政府運作，因為十六萬公務員嘅士氣嚴重受挫。
就算撇開蜚聲國際嘅貪腐醜聞唔計，曾蔭權仍然係一個徹頭徹尾該打嘅頭號小人。試問在位七年以來，呢一個號稱特區一哥嘅政治家有乜嘢貢獻呢？講環保吖，綠色和平資深項目主任古偉牧一提起煲呔曾即刻扯火，攞起布鞋就向佢嘅圖像打過去。古偉牧認為，○九年曾蔭權缺席哥本哈根氣候會議，又冇提出政策應付氣候變化，所以形容佢為「氣候逃犯」。事隔兩年幾嘞，逃犯仍然在逃。
講醫療吖，曾蔭權施政七年資源錯配害到醫護人員忙到一頭煙，手忙腳亂之下引發無數醫療失誤，唔知幾多病人淪為枉死嘅短命鬼。至於內地雙非孕婦排山倒海逼爆產房咯喎，呢個更加係加深中港矛盾嘅嚴重問題，淨係識得傍住富貴朋友黐飲黐食嘅煲呔曾乜都冇做，反而夠膽死吹牛話要發展醫療產業喎。
假如你係劏房居民，相信你對於貪威識食嘅所謂特首更加深惡痛絕。無他嘅，香港嘅房屋政策極度傾斜，官商勾結養肥咗地產霸權，租金之高冠絕全球，低下階層惟有蝸居於轉身都有困難嘅豆腐膶單位，港式貧民窟一旦火燭就死傷枕藉。想話輪候上樓住公屋咩，除咗呆等，仲係呆等。
講到呢度，係時候提提大家。三月三日星期六，即係今日，雖然唔係乜嘢節氣，不過大家都要記住，今日係反貪倒曾大遊行嘅日子。如果你不值曾蔭權既貪婪又無能嘅小人表現，功夫茶熱烈呼籲你成為遊行示威嘅一分子，齊齊用腳踢走貪曾！
總而言之，驚蟄打小人 打爆煲呔曾！