煲呔曾扮死狗拒下台，事到如今，其實只有一條路——沒有落差，只有落台！你要港人「忘了你」，睇來好難，你一手摧毀公務員隊伍嘅「廉潔奉公」守約，你上演了絕對權力絕對腐敗的真人騷，你縮骨治港貪到最後一秒……
港人係有常識嘅，冇理由「退租深圳禮賓府」就甩到身，道理簡單不過，唔通做賊嘅交出贓物就可逍遙法外？講真，你下台——香港都唔會好得去邊，點解？你「親疏有別」用人唯親，你下台就輪到民望一直趴街嘅林公公「坐正」，呢個人肉錄音機冷手執個熱煎堆，你話港人係唔係多得你唔少？下台都要留舊蘇州屎，衰得你啊！
煲呔曾，你嘅污點貪婪，令港人蒙羞嘅恥辱印記永遠洗唔甩，「香港第一貪官」將長留港人腦海，成為香港歷史最污穢嘅一Part！一息尚存，老朽忘不了你！
老朽上年十月中旬，在此販文認可區指煲呔曾任內一事無成，施政本末倒置，最後一份施政報告，臨收工才出口術要「繼往開來」，老朽話佢「哀樂失時，殃咎必至」！這句話語出《左傳》，一個人的行為，哀與樂失序失常，便會迷失自我，給自己與他人帶來傷害！
煲呔曾貪到上天下地全方位，《荀子》說：「學不可以已」，學習不能夠停止；煲呔曾卻「貪不可以已」，貪婪不能夠停止，貪婪失時，殃咎必至！如今都到眼前來，速速下台吧！