政情：陳淑莊轉「型」第二波
立法會議員陳淑莊（Tanya）早前剪咗一頭清爽短髮，顯得成個人後生咗，外界對佢新形象有讚有彈。潮爆嘅佢，前日出席答問大會公審煲呔曾接受富商海陸空款待時，竟然戴上黑超，莫非Tanya係想表達自己「無眼睇」煲呔曾嘅劣行？定係想諷刺煲呔曾係貪官污吏呢？非也，查實係佢嘅形象轉變工程第二波，就係做咗「激光」矯視喇！
Tanya透露，上星期三去咗做激光矯視手術，負責醫生要求手術後三個星期返去覆診，如果一切良好，四個星期就可以完全穩定，到時就唔使再戴眼鏡，即係話佢終於可以洗甩「四眼陳」個花名。佢仲強調，戴黑超係純粹保護對眼免受強光影響，冇乜特別意思喎。問佢剪完頭髮仲做激光，係咪想增加吸引力，Tanya就好開心咁答話：「冇咁諗過架，但係咪出嚟個效果好咗，所以大家咁諗呢？」四両撥千斤，好嘢！