政情：新同盟呻窮抄橋撲水
成立唔夠一年嘅新民主同盟喺區議會選舉攞到八席，成績算係唔錯。新同盟成員食髓知味，諗住派人出戰九月立法會選舉。不過，無錢就乜都係假，成員之一嘅西貢區議員范國威話，如果呢幾個月籌唔到八十至一百萬元選舉經費，就要同新界東新增嗰一席講拜拜喎。
吸水能力唔夠其他黨派嘅新同盟繼區議會選舉呻窮之後，尋日繼續呻窮，話寄望可以喺嚟緊六四同七一等大型活動籌多啲錢，又話要學吓早前台灣民進黨同本港特首候選人梁振英啲籌款策略，喺網上媒體度呼籲市民捐錢。
之前盛傳新同盟會借票畀泛民其他黨派，等佢哋夠票入閘選超級區議員，但新同盟尋日就否認呢個傳聞，話暫時未有任何泛民黨派接觸佢哋，又話七月先會決定係咪借票。不過，既然佢哋手握八票，有人講笑叫佢哋不如諗吓用一張票十萬元賣畀其他黨派，咁做可以籌夠立法會選舉經費，一家便宜兩家着咪幾好？