政情：公審無淚 曾交唔足戲
煲呔曾接受富豪提供嘅海陸空款待，遭各方連日猛烈批評下，醜婦終須見家翁，佢前日終於肯出席立法會答問大會接受議員公審。煲呔曾似乎有備而來，一開始就為自己嘅所作所為向全港市民道歉，之後仲低頭哽咽超過三十秒，可惜破綻百出。煲呔曾惺惺作態，被網民踢爆佢一味耷低頭，根本眼淚都冇滴，完全交唔到戲，更令人覺得佢軟弱，就連即時手語翻譯人員都疑似表現得不耐煩，頂佢唔順。
對於煲呔曾扮喊唧唔出眼淚，我哋請教過一位著名舞台劇演員，佢直斥煲呔曾嘅表現唔合格之餘根本交唔到戲，仲話如果煲呔曾前日唔舒服嘅話，直頭可以搵個臨記頂上。此話可解？即係話煲呔曾可有可無囉！煲呔曾嘅表現主要有兩大問題，一係佢嘅台辭唔係好得，講嘢講到一舊舊，根本唔知自己講緊乜，可見佢嘅心理狀況好明顯有問題，令到聽嘅人都忟憎埋一份。其次係煲呔曾喺會議廳上完全控制唔到情緒，想喊畀人睇扮可憐但又喊唔出。
佢總結話，煲呔曾就算做戲都要做全套，但結果變成一個大娛樂家，令大家喺茶餘飯後多咗好多話題同樂趣，仲話佢想喊又無喊，留咗個畀人恥笑嘅空間。如果大家有睇當日煲呔曾出席答問大會嘅現場直播，畫面左下角其實有一個手語即時傳譯，正當煲呔曾低頭哽咽嘅三十秒期間，傳譯起初都耐心等候，但到中途忽然彈動食指，疑似係按捺不住或不耐煩，即係煲呔曾場戲吸引唔到佢啦！
張學潤：唔係男人所為
形象指導張學潤就話，特首不可輕易流露軟弱嘅一面，喊唔係男人所為，形象大打折扣，畀人覺得佢唔可以管治香港，有反效果，佢更反問：「無錯又點解要喊呢？」其實煲呔曾出席公開場合嘅表現多年來都無進步過，好似多年前佢上京見中央官員嘅時候，竟然坐埋一邊攞本記事簿出嚟抄筆記，十足學生哥咁，非常作狀。如今煲呔曾扮喊博同情，但又唧唔出眼淚，市民係唔會覺得佢真心悔改嘅。