三月三，齊反貪，明天維園見！
曾蔭權捲入一連串貪腐醜聞本來已經眼冤架啦，點不知經過立法會議員群起公審之後，呢一個「蠱惑香港仔」居然臉皮厚如城牆賴死唔走，人人喊打都唔肯引咎辭職。既然係咁，冇辦法嘞，民間團體發起遊行示威，呼籲全港市民三月三日星期六以腳行動，不倒煲呔不罷休！
咦咦咦，上一次○三年有百萬民眾上街遊行，卒之搞到董建華腳痛下台，今次會有幾多人上街呢？人數要有幾多先至可以啟動「腳痛機制」呢？功夫茶雖然唔係未卜先知嘅車公，不過照計上街人數一定唔會少，鬼叫煲呔曾愈來愈樣衰咩，搭完超級遊艇吃喝玩樂歡度春宵，掟低渡輪費用區區五百蚊就算數，以為咁樣就叫做「問心無愧」。至於接受私人飛機款待呀，廉價租用深圳豪宅呀，你話冇官商勾結同利益輸送，真係傻嘅都唔信啦。
講到車公，諗起靈籤，當日求得嘅籤文係咁講嘅：何為邪鬼何為神，神鬼如何兩不分；但管信邪修正外，何愁天地不知聞。呢鋪確係一語成讖，曾蔭權本來神鬼不分，家陣露出貪便宜舔到盡嘅邪鬼真面目，香港第一貪官嘅醜聞，何愁天地不知聞！
曾蔭權雖然喺議員公審嘅壓力之下放棄租用深圳豪宅，之但係始終冇清楚交代點樣同富貴朋友打交道，連人哋姓乜名乜都諱莫如深。喂，又話公職人員必須「比白更白」，吞吞吐吐算得上白過白色咩？計功夫茶話齋，煲呔曾由頭到尾都處於灰色地帶，距離比白更白相差十萬八千里。
冇錯，曾蔭權扮到好似眼濕濕，沉默半分鐘先至可以繼續發言，鄭重向市民道歉咁話喎，可惜佢根本冇認錯，人人都當佢做戲咁做。你知啦，政治家吖嘛，演技通常有番咁上下，否則好難打滾官場幾十年仲要扶搖直上。再講吖，香港無論如何都算係法治之區，莫講你只係眼濕濕，即使你喊到梨花帶雨成個苦命家嫂，甚至聲淚俱下頂痰罐跪玻璃，法律仍然冇可能饒恕一個以權謀私嘅貪官。
香港號稱三權分立，互相制衡，彼此監察，不過到目前為止，似乎行政權、司法權同立法權都吹得佢唔脹，又掹得佢唔長，立法會公審都奈佢唔何。所以咯喎，傳媒作為第四權就有必要發揮正義力量，繼續窮追猛打，反貪不能手軟。廉潔社會得來不易，不容煲呔帶頭污染，唔通你想香港變成貪官污吏多如浩瀚繁星嘅偉大祖國咩！
嗱，功夫茶再次提提大家，三月三日星期六，反貪遊行維園見！仲有吖，該日《東方日報》及《太陽報》隨報附送反貪海報，大家記得帶埋上街呀！