煲呔曾貪腐嘴臉、以權謀私連日曝光，唔好話公僕痛斥有個咁嘅特首令佢哋蒙羞，作為蟻民，老朽眼前嘅香港，回歸後沉淪成咁，好好一個「東方之珠，我的愛人」變成貪腐之城、暴黑材料嘅「特務之都」，唔痛心悲憤就勢係假！
煲呔曾明明係操守、誠信都蒙污，貪心貪到入骨髓，以權謀私鑽窿穿罅，小小空間都唔肯放過，咁嘅特首，髒過屎片尿布，試問仲有乜面目去教堂祈禱？試問仲有乜顏面對全港市民？
宋學士沈括《答同人書》有這麼幾句：「君子之退固有道，又況其進也。度於心而安者則為之，不安者而去之。未必皆是也，蓋可以進焉。心則不安而身行之，雖幸中於義，其為自賊則一也……」
坦白講，香港人待煲呔曾一家不薄，如今他治港七年，為廣大市民——尤其貧苦大眾勞過心嗎？他所操勞的，去到臨收工都為自己退休享福鋪路，沒有人認為退休高官不可以住大屋，過豪奢生活，問題只係他「鋪」得太張狂、太肉酸！還要賴市民要求高；喂！你胃口大成咁，史前恐龍都要絕迹，難道你連太平山個老襯亭都要生吞埋？
孟子說一個士大夫「其交也以道，其接也以禮」，如今他交不以道，搞到香港烏煙瘴氣、禮崩樂壞，不下台，冇天理！
煲呔曾面對議員質詢，變成一隻風乾死鴨，假道歉而死不肯下台，貪腐浮面，寸步難行。再戀棧何益？