特首候選人何俊仁係「唐英年B隊」，人盡皆知，點知泛民主派班立法會議員做B隊做到底，尋日竟然開記招呼籲市民如果收到特首民意調查時，千萬唔好揀話支持邊個，以免讓人誤會以為有民意就等同有民意授權，變相合理化小圈子選舉喎。咁搞法，如果冇民調比較三位特首候選人，最終得益係邊個呢？咪係益晒民望極低嘅唐英年囉！
講開又講，民主黨代主席劉慧卿尋日自爆，話同一個政界舊電池賭咗餐飯，內容大概係某位候選人攞唔攞到足夠提名票，結果卿姐勝出。
卿姐又自爆近日同行政會議召集人夏佳理（Ron）賭咗餐飯，阿Ron估港大學者搞嘅「3‧23特首投票」有十萬人參加，反而佢就話冇咁樂觀，仲話寧願輸餐飯，都希望多啲人投票喎。
嘩，其實卿姐講嘢都好矛盾，又呼籲市民杯葛特首民調，但又希望多啲人參加港大嘅投票，究竟佢想點呢？