政情：馬友友力谷亞洲之旅
享譽全球嘅華裔大提琴家馬友友，係法國出世嘅浙江人，佢嘅粉絲遍布世界各地，成就屬於全世界，但係講到家嘅感覺，始終都係源自亞洲。尋日佢聯同十四年前自創嘅「絲綢之路合奏團」成員，齊現身香港文化中心，為明天開始嘅亞洲之旅瞓身宣傳，「馬迷」們就要把握僅此一場嘅音樂盛會喇！
身為合奏團音樂總監嘅馬友友話，父親係浙江人，當佢首次回到寧波時，感覺十分奇妙。今次亞洲之旅首站由香港開始，然後喺內地五個城市各表演一場，當中廣州、杭州及西安係樂團首次獻技，但尾場就喺韓國首爾上演。
樂團今次表演嘅曲目包括唔少享譽全球作曲家嘅作品，其中《波斯詩歌》更屬世界首演，由馬友友及卡滿札琴（Kamancheh）演奏家賈賀爾合奏，卡滿札琴音色類似二胡，但比二胡厚實，到時兩人必定擦出新火花。