政情：煲呔曾臨老無家可歸
面對各方連日猛烈批評，貪盡富豪海陸空款待嘅煲呔曾，尋日不情願下被迫出席立法會答問大會接受議員公審。煲呔曾見群情洶湧、民怨沸騰，終於宣布放棄租住富豪提供豪裝嘅深圳「禮賓府」，妄想洗脫貪瀆污名。由於煲呔曾位於港島麥當勞道六十四號嘅「僭建祖屋」仍然有租約在身，故此幾可斷定，佢執包袱遷出禮賓府後可能無家可歸，真係自作孽不可活，一切都係咎由自取。
廿幾萬訂金可沒收
煲呔曾一心諗退休後入住近萬呎嘅深圳東海花園，年租八十萬人民幣，如今佢單方面解除租約等於毀約，所以業主尋日講到明會沒收相等於三個月租金嘅訂金，即係大拿拿冇咗廿幾萬，對於貪小便宜兼孤寒成性嘅煲呔曾嚟講，肯定肉都赤埋。不過，唔見錢都係其次，相信煲呔曾最頭痕係即將要執包袱滾出禮賓府，相信要喺面對廉政公署調查佢涉嫌收受利益下，四出搵屋租。
大家都知煲呔曾喺港島麥當勞道六十四號有間「僭建祖屋」，可惜間屋有租約到年底，唔係佢兩公婆話住就住，除非毀約賠錢。不過，賠錢都係冇用，佢間祖屋「豆膶」咁細，邊度擺得晒佢多年來收收埋埋嘅禮物吖，好似賣剩嘅紅酒、佢老婆做女嗰陣時嘅舊衫、雜物等，唔係佢都唔使喺深圳租一間近萬呎嘅豪宅啦，所以佢要再搵一間大屋能夠載得晒啲物資都唔係一件易事。
講到呢度，究竟煲呔曾兩公婆可以搬去邊呢？莫非折墮到要去瞓天橋底？但做露宿者分分鐘被食環署人員驅趕，又話唔定佢得閒可以好似以前「九龍皇帝」咁周圍寫吓大字，控訴社會搞到啲富豪唔敢再款待佢坐私人飛機、豪華遊艇、提供豪裝大屋等，難怪佢尋日喺答問大會上講到喊咁款喇。又或者煲呔曾可以暫住酒店或租間細屋住，嗰啲儲咗幾十年嘅雜物就租幾十個迷你倉暫存亦都得。
其實上述所講嘅搬遷方法都係假設，但有個事實就係萬一廉署喺無受干預下鐵面無私，秉公調查煲呔曾涉嫌收受利益嘅行為，一旦入罪嘅話，咁就可能要喺赤柱監獄留番個海景位畀佢喇！