中環出更：胡劍江省靚百年老招牌
早前落幕嘅香港國際珠寶展，係亞洲最大春季珠寶展，卓妮咁貪靚，梗要去八吓最新潮流資訊啦。期間見到潮州商會副會長胡劍江（Michael），原來佢係胡良利珠寶第五代傳人，又係主辦機構貿易發展局珠寶業諮詢委員會成員，難怪佢幾忙都要抽空巡視，認真勤力。
卓妮同Michael傾開至知，原來胡良利早於一百一十年前已喺潮州成立，直至五十二年前，佢父親胡賜榮將基地移師香港，成立胡良利珠寶有限公司。其後胡氏後人陸續省靚先祖招牌，另一間以胡良利為名嘅胡良利（萬益）珠寶行，老闆胡楚南正係Michael嘅堂叔，所以香港確係臥虎藏龍之地。
教年輕人知足勿貪婪
Michael將百年老店發揚光大，現時係意大利K金首飾及鑽石總經銷，投資版圖仲擴展至鋁業、資產管理、地產及石油化工等。佢亦瞓身投入社會公益，連續三年與一家地產公司合作喺校園推廣品格教育，教下一代要知足唔貪婪，佢話社會急功近利，如果未來主人翁能力高、品格低，咁就弊喇。