中環出更：父母搞搞震 要王梓軒相睇
城中名人趙式浩搞咗份專門推介豪華樓盤嘅免費雜誌，前晚創刊酒會邀請咗好多年輕才俊出席，除咗佢家姐趙式芝外，仲有莊士集團太子爺莊家彬、浸大校董會主席王英偉之子王梓軒（Jonathan）都係座上客。
趙式浩籌備百日宴
講起喜慶事，趙式浩話會為其三個月大嘅兒子趙子勤（Ian）籌備百日宴；而Jonathan就透露其父母暗地裏為佢製造機會相睇喎。
Jonathan話，佢身為家中長子，父母當然期待抱孫啦，所以不時暗地裏幫佢製造相睇機會，但講到幾時成家立室，佢就話唔知喎。不過話時話，Jonathan現時仲係同家人同住，相信將來結婚都要另覓居所，原來佢嘅理想居停，最嚮往係以前喺美國波士頓求學嘅生活，嗰種兩層高並附設後花園嘅居所，空間廣闊又鄰里相望，確實係理想嘅居住環境。
不過，自從Jonathan決定回港發展，就要面對香港嘅實際環境，佢話就算選擇到西貢、元朗或大埔等鄉郊地區居住，但上班路途遙遠，最終都係選擇跟隨父母居於市區。
至於有否想過自行置業過獨立生活，Jonathan話唔係咁易，但對於時下青年慨嘆買樓困難，佢坦言樓價貴並非依家嘅事，置業係需要經過長時間經營，所以年輕人剛踏入社會就話要買樓，似乎有啲不切實際喎。
卓妮