作為傳媒，天職係監督政府，但香港又有幾多間傳媒好似東方報業集團咁敢言，批評官商勾結嘅煲呔曾絕不手軟吖，好似無綫電視同亞洲電視兩間免費嘅電子傳媒咁，有人話佢哋喺煲呔曾收受利益醜聞中避重就輕，畀晒機會煲呔曾長篇大論解釋，當中只有有線做番啲正常採訪工作。
一向畀部分人批評「是是但但」嘅無綫新聞，前晚竟然幫煲呔曾做專訪，畀機會佢向全港市民講埋啲唔係解釋嘅解釋，以圖淡化醜聞。正所謂大話講一千次都會成真，無綫新聞畀咁多時間煲呔曾解話，隨時可能引來反效果。
除咗無綫外，前晚亞視新聞報道煲呔曾嘅醜聞時，竟然將佢早上打去電台解釋嘅一大堆廢話，差唔多全部播番晒出嚟，至於其他政界人士嘅批評，竟然唔係同一時間播出，中間夾雜其他新聞，處理相當特別。兩台咁樣處理新聞，背後用意係乜，真係佢哋自己先知，莫非佢哋想做政府嘅喉舌？