我哋上個月底講過，設備完善、裝修美輪美奐嘅新界鄉議局沙田石門新大樓，因為場地租金定價太過低，搞到即使租出都維唔到皮，甚至有以優惠價錢租用場地嘅團體，喺場地內掛晒廣告宣傳，名副其實又食又拎，租用者就好和味，但鄉議局就好閉翳，最近佢哋就決定增加大劇院場租填氹。
鄉議局決定今年四月一日開始調高新大樓內各場地租金，好似音樂設備正到可以開演唱會同做粵劇嘅大劇院咁，每逢星期五至日、及公眾假期等繁忙時間，每四小時收一萬六千八百元，之後每加半小時就收一千五百四十元，加幅足足兩成咁多。
團體如果要租用大劇院做綵排，或者其他冇觀眾嘅活動，租金可平一大截，四小時亦只需八千四百多元，加幅同樣係兩成。
中肯講句，其實喺新大樓搞活動真係幾好，可惜局方宣傳仲係唔夠，搞到出租率始終麻麻，如果真係想搞旺個場，除咗要盡快啟用餐廳外，班鄉紳就真係要諗諗宣傳策略喇。