政情：包庇煲呔曾 民記梗仆直

鐵證如山 仲要死撐

話民記包庇煲呔曾，絕非無的放矢。本報喺星期一獨家披露煲呔曾去澳門出席賭場春茗，與三山五嶽江湖人物一齊睇騷，但民記立法會黨團召集人葉國謙竟然同傳媒話，煲呔曾未必要公開交代，只需自行評估有關場合適唔適合出席就可以喎。到咗星期二，本報進一步踢爆煲呔曾原來乘搭富豪億元豪華遊艇去澳門歎世界，仲喺遊艇上過夜聯歡，令公眾批評聲音進一步增大。

當日人民力量議員陳偉業睇唔過眼，要求喺星期三立法會大會上提出緊急質詢，追究煲呔曾涉嫌利益衝突，但葉國謙又再發功，話民記唔認同有急切性，議員要提問可以排隊喎。特首涉嫌利益衝突都話唔緊要，莫非佢選區發現有老鼠先至有急切性？本報於是喺星期三繼續爆料，揭發煲呔曾過大海前曾經搭富豪私人飛機去泰國布吉島度假，鐵證如山，不容抵賴。

面對煲呔曾嘅誠信破產，就連之前力撐佢嘅旅遊界議員謝偉俊都即時轉軚，要求煲呔曾去立法會交代事件。不過，民記主席譚耀宗此刻仍然死撐，只係隔靴搔癢話：「曾蔭權應該注意事件所引發嘅爭議，但目前法例並冇規定特首唔可以接受任何款待，又話依家已經有一套申報制度。」當本報尋日再爆出煲呔曾喺深圳租住嘅退休居所，原來係過萬呎嘅超豪行宮深圳「禮賓府」，而且業主仲係同煲呔曾關係密切嘅東海集團主席黃楚標，譚耀宗仍然表現得輕描淡寫。

講到呢度，相信大家都知道民記喺事件上係幾咁無恥，完全係掩耳閉目不理民意、不辨是非，盲目包庇煲呔曾，除咗形容佢哋低水平外，唯一解釋就係佢哋同煲呔曾之間隱藏不可告人嘅秘密。選民嘅眼睛係雪亮嘅，如果民記繼續死攬住煲呔曾呢個負資產，最終只會走上一條不歸路，嚟緊九月立法會選舉必定被廣大選民唾棄。睇路呀，民建聯！