中環出更：中藥業燕窩款客 好滋陰
近期春茗酒會多到爆，城中名人日日趕幾場，就算係絕世靚茶靚酒當前，都飲到麻木。香港中藥業協會日前喺中華總商會俱樂部舉行嘅新春酒會，一於搞搞新意思，以`即飲燕窩及花旗參茶招呼賓客，啖啖清甜好滋陰，試過嘅政商名流都話正，估唔到協會將中藥業推崇嘅養生之道應用喺新春酒會上。
真空包裝不含防腐劑
當日現身嘅政商名人有立法會議員方剛、廣東社團聯會主席王國強、孖人牌代理昌興老闆余壽寧等，中藥業老字號揸弗人齊集。
身為協會理事長嘅百成堂集團主席李應生同協會會長、北京同仁堂製藥副董事長黃光輝忙到滿場飛，氣氛好熱鬧。當日仲有唔少後生面孔，包括李應生囝囝、百成堂董事總經理李俊文，佢已係第四代傳人。
當日任飲嘅即飲燕窩係余仁生及百成堂出品，位元堂亦慷慨送贈自家燕窩畀出席嘅賓客，賓客都甜到入心。余仁生（香港）董事總經理黃雪英話，依家即飲燕窩採用真空包裝技術，冇防腐劑夠晒天然健康。
黃光輝藥材飲品養生
黃光輝就同卓妮分享獨家養生秘訣，就係日日用蟲草、花旗參及枸杞焗水飲，難怪佢面色紅潤，大家不妨偷吓師。
卓妮