政情：葉劉借金句自嘲「超熟女」
新民黨主席葉劉淑儀早幾日宣布參選特首，為吸引大家支持，佢語出驚人話，如果特首選舉係由佢同立法會主席曾鈺成競逐嘅話，係一場「君子與淑女」之爭咁話。呢句政壇新金句一出，即時全城哄動，葉太亦隨即成為網友惡搞嘅對象，除咗不絕嘅惡搞改圖外，仲寸爆話兩人係「偽君子與熟女」之爭，搞到葉太尋日都自嘲係「超熟女」。
葉太尋日出席商界分享會時，唔覺意又畀人提起大家對佢「熟女」嘅嘲諷，話說活動完結報告，由於葉太準備充足，所以主持人就大讚佢「有腰骨、有膊頭」，仲話佢唔似淑女，反而似女強人喎。葉太聽完，都唔知點反應，只係回應話：「超熟個熟嘛！」好多人都知「熟女」意指年紀稍大嘅女性，葉太咁大方自嘲年紀大，抵佢轉型成功嘅。