政情：謝永齡做調查打壓CY？
城市大學教職員協會最近搞咗個「前校董會主席意見調查」，前校董會主席就係特首選舉參選人梁振英（CY），協會聲稱係為咗評估CY嘅工作表現。但話時話，教職員協會主席正係高等教育界選委謝永齡，佢提名咗特首候選人唐英年，協會依家做個咁嘅調查，當中有冇涉及利益衝突就見仁見智喇。
協會出咗封信畀城大嘅同事，話據聞身為前校董會主席嘅CY，喺任內曾取消「生活指數調整」，又喺冇諮詢下取消退休公積金制度同增薪點、仲話CY打壓教職員協會及向教職員協會理事發律師信，跟住叫班城大同事透過調查評估吓CY嘅工作表現咁話，調查結果係點，相信唔使講都知道。
事實上協會主席謝永齡日前先至提名唐唐參選，佢喺呢個敏感時候做調查評估CY嘅表現，唔知怕唔怕畀人話佢係借調查之名幫唐唐打壓CY呢？