政情：煲呔曾侮辱富豪

《東方日報》及《太陽報》連日獨家踢爆煲呔曾接二連三接受富商私人款待，先乘坐重慶富商張松橋嘅超豪私人飛機直飛泰國布吉度假，日前又坐另外幾名富豪嘅億元豪華遊艇過澳門遊玩兼過夜，仲出席賭場春茗與三山五嶽人士睇騷，完全忘記自己嘅特首身份，惹來外界批評。煲呔曾見勢色唔對，尋日晨早就打去電台長篇大論解釋補鑊，淡化自己享受嘅利益，期間佢踩到班富豪嘅豪華玩具一文不值。

先講過澳門嘅遊艇，煲呔曾聲言船上只有電視新聞，冇卡拉OK同賭博活動，甚至食過嘅早餐亦只有水果、豬骨粥同炒麵，潛台詞係好似人哋虧待佢咁，但食過乜嘢佢自己最清楚。唔單止咁，佢仲三番四次話自己有跟政府規矩將市價交通費畀番班富豪，有人事後幫佢計番條數，其實來回澳門船票最貴都係價值六百幾蚊，同佢乘坐造價過億元遊艇相比，真係蚊髀同牛髀。

扮憂國憂民 呃盡港人

講到去泰國嘅超豪私人飛機，來回泰國一轉要三十萬至四十萬港元，但煲呔曾就話已畀咗客機嘅經濟客位價錢，計落最多咪幾千蚊，與租用私人飛機比較，都係差一大截。所以煲呔曾話畀足市價交通費，等如間接侮辱班富豪，班富豪平時畀貼士都多過佢啦，如今被佢踩到一文不值，會唔會心都淡晒呢？

話時話，○七年煲呔曾競逐連任時以「做好呢份工」做口號，近期仲話要奮鬥到最後一分一秒，講穿咗其實就係想貪到最後一分一秒至真。還記得佢最近接受電台訪問時話好驚歐債危機，要做「最壞打算同最高防線準備」，又寧願任內處理歐債爆煲，擺出成個憂國憂民嘅形象，但其實心術不正，轉頭就接受富商款待，一心想呃盡港人，所以立法會同執法機構唔查佢點得呢！