中環出更：滿分法國紅酒葉振南愛不釋手
紅酒魅力沒法擋，連藍帶啤酒亞洲區總代理葉振南（Stephen）都愛不釋手，佢近日購入一隻被著名酒評家Robert Parker（RP）評為一百分嘅法國佳釀，就係1990年法國波爾多紅酒Chateau Montrose，佢形容初入口帶香濃嘅木桶及炭燒香氣，落到喉嚨又慢慢滲出葡萄甜香，猶如萬花筒般千變萬化。
葡萄牙酒經濟啲
愛歎紅酒嘅Stephen，家中有唔少珍藏佳釀，但最多都只係飲過RP九十六分嘅紅酒，所以今次飲到滿分紅酒固然開心，仲同大仔Albert一齊分享添。
Stephen話，如果飲紅酒想經濟啲，可以揀葡萄牙紅酒，好似2009年嘅Herdade Das Albernoas，入口滑溜，果香四溢，售價只係百多元，佢年前已入咗大批呢隻酒，批發畀酒樓同超市。
講起Stephen嘅大仔Albert，原來喺英國大學畢業，現於私人飛機公司工作，佢睇好呢行發展潛力大，希望將來自立門戶喎。