人口愈來愈老化 施政愈來愈神化

功夫茶講嘅紀錄係香港人口。政府統計處處長歐陽方麗麗公布，根據二○一一年人口普查結果，直至去年六月底，居住人口有七百零七萬人，較十年前增加三十六萬。本港居住人口之中，六百八十六萬係常住居民，二十一萬係流動居民。

人口突破七百萬之餘，老化問題亦日益明顯。本港人口過去十年持續老化，原因係出生率同死亡率都處於低水平。人口年齡中位數由○一年嘅三十六點七歲，升至○六年嘅三十九點六歲，再進一步升至二○一一年嘅四十一點七歲。

如果閣下係男性，而又處於春心蕩漾嘅求戀期，恭喜你嘞，陰盛陽衰現象變本加厲，港男追女仔選擇更多。男女比例由○一年嘅一千名女性對九百六十名男性，下降至去年一千名女性對八百七十六名男性。如果閣下係女性咯喎，惟有祝你唔好成為敗犬一族嘅剩女啦。

既然提到剩女，咁就不妨講多一項數據。○一年男士於適婚年齡組別卻從未結婚嘅比率係百分之三十九點三，一一年上升至百分之四十六點八。女士方面，○一年未婚比率係百分之三十四，上升至去年百分之三十八點九。

對於呢一大堆數字，大家有乜感想冇呀？功夫茶最大嘅感想就係，人口愈來愈老化，施政愈來愈神化，居然一直都冇推出適當嘅配套措施作為養老之用。喂，香港特別多壽星公同壽星婆，人口老化係必然現象，政府係咪應該未雨綢繆搞好老人服務呀？譬如話，興建多啲安老院，唔好要公公婆婆輪候到兩腳一伸瓜老襯都無法入住。又譬如話，諗諗辦法推出全民退休保障，事關家陣嘅強積金問題叢生，等佢咬糧九成餓死。再譬如話，醫療服務有必要大大擴充，畢竟風燭殘年特別多病痛，唔通睇醫生要等一年半載咩！

功夫茶省起房協之前推出富貴長者屋計劃，入場費居然要三至四百萬元。公營機構唔去雪中送炭照顧兩袖清風嘅老人家，反而錦上添花關愛腰纏萬貫嘅上等人，唔怪得之政府日日被鬧無能啦。

係呀，確實係無能o架，曾蔭權自己就識得坐豪華遊艇過大海去澳門吃喝玩樂，身邊仲有一大班猛人群星拱照，難為香港街頭有大批長者拾荒度日，執紙皮執到手軟都未必得到三餐溫飽。如果唔係政府無能唔識得老吾老以及人之老，一大把年紀都唔使卑躬屈膝捱苦日子啦。當你見到煲呔曾嗰一種「曾門酒肉臭」，你就會明白點解政府咁神化。