民主黨立法會議員李永達（高達）打算喺今日提出急切質詢，追問特首候選人唐英年大宅僭建風波，原本質詢應由立法會主席曾鈺成審批裁決，但偏偏曾鈺成日前話過會考慮參選特首，為免利益衝突，所以內務委員會尋日要開特別會議討論，喺主席審批前先過冷河。高達喺會上話，公眾關注唐唐僭建，事關重大，今日應該跟進唐唐僭建單醜聞喎。
不過，人民力量陳偉業（大舊）就質疑高達此舉係為白鴿黨特首候選人何俊仁造勢，大鬧高達係政棍、無恥，將立法會變成選舉活動場所。
不過，大舊嘅批評又引來其他挺唐建制派議員加入口水戰，幫唐唐講好說話，最終仲否決埋高達嘅急切質詢添，但最終審批權仍在主席手上。話時話，唐唐僭建醜聞備受批評，泛民內部係咪應該團結處理咗呢啲大是大非嘅問題先呢？