政情：大會堂50周年舊照任睇
香港大會堂五十歲生日，過去半世紀，大會堂陪住港人成長，見證咗唔少美滿嘅婚姻故事，成為港人集體回憶。
康文署最近徵集咗二百幾張有關大會堂嘅珍貴歷史圖片，免費畀人欣賞之餘，尋日仲搞咗個分享會，請來國際聲樂名家費明儀及名鋼琴家羅乃新，分享過去喺大會堂留下嘅美好難忘回憶。
費明儀話，多年來喺大會堂演出過嘅歌唱、話劇、戲曲真係多到唔記得晒，佢記得喺六二年首次喺音樂廳舉行個人演唱會，六五年首次舉行明儀合唱團演唱會。至於羅乃新，早在學生年代就同大會堂結緣，佢話當年參加完校際音樂比賽，等候公布結果前同朋友仔玩「猜樓梯」時被職員驅趕，輸咗比賽匿喺暗角哭泣。
羅乃新喺外國學成歸來後，更長期喺大會堂演出發展音樂事業，佢形容，如果無咗大會堂，對自己音樂事業來說，等於守寡，如果將來要搬去西九演出，就等於改嫁喎。不過，大會堂已列為一級歷史建築保護，咁佢就唔使改嫁喇。