政情：煲呔家丁阻揭「曾」相
本報獨家揭發煲呔曾不顧特首身份，以祭祖為名乘坐富商豪華遊艇去澳門出席賭場春茗活動，與三山五嶽人士一齊睇騷，仲喺遊艇開派對兼過夜，市民睇到眼都凸埋，狠批官商勾結。手無寸鐵嘅普通市民人微言輕，見到呢啲不平事都只能靠尊貴嘅立法會議員代言，可惜部分建制派議員真係不知所謂，阻撓跟進及追究煲呔曾單醜聞，十足家丁為主人保駕護航，認真無恥。
煲呔曾過大海接受富商款待嘅醜聞已臭名遠播，相信廣大市民都希望知道佢喺過程中得到乜嘢好處，一向敢言嘅人民力量立法會議員陳偉業尋日就喺內務委員會特別會議上，爭取支持喺今日提出急切質詢，要求煲呔曾交代過大海嘅原委、有冇收受利益、以及會否影響本港聲譽等。不過，就喺呢個時候，多名建制派議員好似「家丁」咁伸個頭出嚟反對。
「咩叫江湖人物？」
出晒名同煲呔曾分屬老友嘅專業會議石禮謙就第一個出聲，用謬論幫煲呔曾解畫，佢話：「人在江湖，咩叫江湖人物？係邊個堂（口）？」咁都未算低水平，金融服務界詹培忠仲離譜，佢竟然話：「有報章成七大版講呢件事，立法會無理由踩上一腳。」報章報道正因為呢啲醜聞同公眾利益有關，立法會都唔跟進，咁乜嘢部門跟進呢？莫非要執法部門跟進？
除咗上述兩位外，又點少得煲呔曾另一老友經濟動力林健鋒吖，佢執石禮謙口水尾話：「人在江湖呀，我哋算唔算江湖人物？同枱食飯算唔算接觸？」到底佢明唔明以煲呔曾嘅身份，唔應該瓜田李下嘅道理呢？至於旅遊界謝偉俊就覺得，特首辦都回應咗報章查詢，除非質疑煲呔曾嘅誠信，否則唔能夠抽起條筋就提急切質詢喎。
煲呔曾先有慳電膽益親家、後有暗助弟婦提早獲雷曼賠償，誠信早已破產，質疑佢誠信有幾咁出奇呢？況且本報透過特首辦向佢提多條問題都無回應，當中唔係身有屎，就係心中有鬼。部分功能組別議員被批評為大懶蟲外，估唔到煲呔曾一單醜聞，又揭露多幾位議員應做唔做，呢啲議員唔好話加人工啦，減人工就差唔多。