中環出更：方文雄特色酒店 前衞大膽
協成行集團首次進軍酒店業嘅代表作，佐敦長樂街一號嘅「木的地酒店」（Madera），前晚喺眾多城中名人見證下隆重開幕，協成行兼木的地酒店董事總經理方文雄（David）戴上鮮艷煲呔，喜氣洋洋招呼政商界老友，仲親自擔任導賞員，帶大家參觀酒店精心打造嘅西班牙特色房間添。
酒店其中一間最大嘅九百幾呎房中之王，一入房門就見到開放式嘅客廳及睡床喺中間，而且坦蕩蕩咁放咗個大浴缸喺度，前衞大膽嘅西班牙風情，令嘉賓們驚喜不已。
與設計師不打不相識
點解走西班牙設計路線？原來背後有段趣事。David話，年幾前佢親自處理一宗旗下豪宅單位嘅租客投訴，投訴者正係酒店女設計師Gemma Fletcher，就此不打不相識，一拍即合，齊齊打造夢中嘅旅者居停。
當晚撐場嘉賓有中華總商會會長蔡冠深、廣東社團總會主席王國強、亞洲金融集團主席陳有慶、品牌發展局主席陳淑玲等人，David嘅爸爸方潤華、太太方符世蔚及囝囝方添輝（Jonathan）三代亦齊出動。David話，協成行集團擁有二百萬呎嘅收租物業，但喺大地產商環伺下，若唔求變只係死路一條，所以佢大膽廣納賢才，自組班底管理酒店業，笑言係「摸着石頭過河」。
Jonathan係恒生銀行旗下投資管理公司嘅投資分析員，佢笑稱爸爸投資酒店唔係佢嘅建議，但以專業角度睇，酒店業嘅投資前景唔錯喎。
卓妮