英年牌金句有云，做男人要有膊頭，做公職要有腰骨，呢兩條處世大道理本來係絕對正確嘅，可惜金句發明家並非一個堅毅實踐者，唐英年利用老婆做擋箭牌卸除僭建地下宮殿嘅責任，點睇都唔似有膊頭同有腰骨。
好嘞，如果話做男人要有膊頭，做特首又要有乜嘢呢？非常明顯，做特首要有口齒，言而無信肯定唔係一個適合做特區一哥嘅人選，即使勉強黃袍加身，後果都係禍患無窮，最低限度會惹來萬人空巷上街抗議。
中華基督教青年會做過一項調查，上月向多間小學派發問卷，訪問超過一千二百名小五同小六學生，以一百為滿分，受訪學生對曾蔭權嘅支持度係五十五點八五分。調查又顯示，大約六成小朋友認為特首最重要特質係「言出必行、言而有信」，其次係「大公無私、賞罰分明」。五成四受訪學生認為，下一個財政年度政府應該優先處理保護兒童。中華基督教青年會就話嘞，曾蔭權仍未實現部分競選承諾，包括成立兒童事務委員會。
嗱，兒童係社會未來主人翁，雖然家陣人微言輕，之但係赤子之心往往代表人類最純潔嘅高尚情操。耶穌都講過啦，人如果唔變番小孩模樣，係唔可以進天國㗎。既然小朋友覺得言而有信係最重要嘅特質，亦即係話，冇口齒嘅人冇資格做特首。如果你問，唐英年有冇資格成為特區之首呀？功夫茶相信莫講話天真無邪嘅小朋友耍手擰頭，就算係老謀深算嘅成年人都會大大聲講一個「不」字。謊唐僭建行為已經赤裸裸展示唐唐嘅誠信極之有問題，開頭唔認僭建，跟住狡辯話「掘深咗」，後來證實僭建空間大到超過二千平方呎，哈，呢一位公子哥兒居然推個老婆出嚟送死，護夫情切嘅唐太將所有責任攬上身。計功夫茶話齋，唐太先至有膊頭又有腰骨，反而自己個老公仔就唔似一個男人。
所以話啫，做特首要有口齒，唔理你係唐英年定係其他有意逐鹿中原嘅政客，言而無信一定係死症，死得好慘嘅絕症。假如唐唐受到京老爺唾棄，其他特首參選人邊個勝算較高呢？功夫茶真係唔敢講，淨係一條「你是否共產黨員」嘅問題已經問到人哋口啞啞。一早決定參選嘅梁振英好少少，一口否認話唔係共產黨。至於積極考慮參選嘅曾鈺成，既不承認，亦不否認，黨員身份至今成謎。喂，言而有信係講一個「信」字，態度含糊不清點樣取信於人呀？
其實講真吖，但凡從政就要有誠信，唔做特首都要有口齒，否則咯喎，大話精必定淪為人人喊打嘅過街老鼠！