政情：阿陶做支部主席爭曝光

社民連今個月廿五號會舉行九東支部改選，現任主席姜新華講明唔會連任，希望由第二啲黨友試下做。而好多兄弟都覺得，九東支部應該幫阿陶全力助選，所以由阿陶做最合適。阿陶就同我哋講，話自己未做過支部主席，所以都有興趣，而且唔算食回頭草，唔怕畀人話肉酸。

由於阿陶唔再係區議員，連一塊街板做宣傳都無，所以做到支部主席，總算執番個桔，第日可以多啲機會發言曝光。阿陶仲話，現時仍考慮緊出唔出戰立法會，不過近日評估過形勢，覺得一班街坊對佢仲有少少感情，有啲仲覺得佢輸咗好慘，所以唔排除有同情票喎。