政情:人力嗌回水包圍鐵頭仁

人民力量同民主黨一向勢成水火,兩幫人如果同時在場,小則口角大則動武。白鴿黨主席何俊仁尋日出席一個論壇時,又被幾十個人民力量支持者狙擊,一路包圍鐵頭仁,一路鬧佢。搞到鐵頭仁好狼狽,要警方護送至走到。但最好笑係班人力支持者叫何俊仁「回水八千」,唔通認為鐵頭仁有機會做特首?

鐵頭仁尋日下午去咗一個以「內地與香港矛盾」為題嘅街頭論壇,咁啱附近有幾十個參加緊人民力量活動嘅市民,呢班人見到鐵頭仁,即刻好似發現新大陸咁,衝埋去何俊仁度包圍佢,不停高叫口號,仲喺正佢耳邊吹喇叭,實在令人煩擾。

鐵頭仁畀成大班人包圍騷擾,都唔知話佢淡定好抑或反應慢,全程只識坐喺度,無出聲無反應,擾攘咗一陣,論壇最終被迫腰斬,而鐵頭仁亦要叫差人幫手開路,至可以安全離場。

其實白鴿黨係時候諗吓有咩方法對付人民力量,再係咁落去,白鴿黨都唔使旨意可以成功落區宣傳。 

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報