政情：工聯二子扮大老倌穿崩

一直爭取保留新光戲院，推動本地粵劇文化嘅工聯會立法會議員王國興同潘佩璆，原定尋晚同戲迷們喺新光舉行送別晚會，唔使諗場面一定係老戲迷傷感，新戲迷感可惜。不過，喺新光執笠前兩日傳來佳音，盛世天戲劇團同業主達成協議，用月租一百萬元續約玩多四年，新光暫時唔使落幕，戲迷自然雀躍，收集市民簽名保留新光嘅王國興同潘佩璆兩個仲開心，兩人尋日特登着起戲服扮起粵劇大老倌，兩人唔理戴咗眼鏡着住皮鞋大穿崩，仲好似大細路咁通街走慶祝，笑騎騎十分亢奮。

做戲還做戲，王國興無忘記趁機踩夕陽政府一腳，佢話：「政府喺搶救新光戲院上零支援，感到失望、遺憾同憤怒，市民唔可以寄望新光續約四年又四年，新光係集體回憶，如非得到有心人，大業主既出錢出力，新光已經唔存在。」佢希望下屆政府成立保育本土文化基金，畀藝術團體及投資者申請。