政情：蘇菲退位 唔益自由黨
經濟動力同自由黨組成工商專業聯盟後，一直話會喺功能組別選舉上合作，但政治其實係人際關係，好多嘢唔係咁簡單。紡織及製衣界立法會議員梁劉柔芬（Sophie）九七年由臨時立法會開始就做議員，據聞佢對嚟緊立法會選舉意興闌珊，外界估計佢會讓位畀自由黨嘅鍾國斌。但點知Sophie唔係咁諗，自己雖然唔選，但寧願培育新人上位，都要頂住個位唔放。薑的確愈老愈辣！
本身係自由黨嘅Sophie，○八年贏咗立法會選舉後因為黨務問題，同林健鋒、梁君彥等人另組經濟動力，分家至今。但去年佢哋又重組成工商專聯，打算喺選舉協調上同自由黨有傾有講。所以Sophie一話唔做，大家都覺得會由近年加入自由黨嘅鍾國斌頂上。
與鍾國斌有牙齒印
但據聞Sophie死都唔肯益自由黨，原因係○八年立法會選舉時，鍾國斌已經用獨立身份挑戰佢，雖然鍾國斌最終輸咗，但Sophie贏得唔多，呢條刺就一直插喺Sophie心中多年，所以就算鍾國斌現時入咗自由黨，算係「半個自己人」，都唔諗住畀佢上位。
Sophie近日仲打算搵自己友接棒，佢就係香港紡織商會榮譽會長陳亨利，陳亨利知名度唔算高，但喺業界有一定江湖地位，做過兩屆紡織商會會長，亦做過保良局主席、和平統一促進會副會長等公職，但就未加入經濟動力。如今Sophie打算畀「街外人」上位，睇嚟佢對自由黨真係冇情講。
不過有紡織界人士分析，上屆選舉Sophie有千二票，的確係唔少。但鍾國斌無掛自由黨個名，單挑Sophie都拎到七百幾票，即係話個人基本盤都有唔少支持者。再加上睇返往績，Sophie一直有嚴重跌票趨勢，由○四年得票率高達近八成，到上次選舉得番六成幾，如今鍾國斌以自由黨名義出戰，都唔好話完全無機會。
據聞現時仲係自由黨同經濟動力講數時期，最尾會係兩人互撼定係一人自動當選，就要睇邊個手瓜硬啲喇。