中環出更：陳趙滿菊鍾情Diane Freis中國風
正月好快就過，過年期間，唔少城中名媛靚女都鍾意配搭中國傳統服飾，令到喜氣洋洋嘅過年氣氛更加濃郁。日前卓妮喺一個春茗活動上，見到前保良局主席陳亨利太太、國際華商協進會會長陳趙滿菊（Joise），佢着件桃紅色鬆身外套，衣襬繡上精緻嘅花花圖案，不經意散發淡淡嘅中國風。原來件衫係美國設計師Diane Freis自家品牌，神秘嘅東方色彩服飾，連洋人都着迷。
注重細節 色彩繽紛
Joise話，佢好鍾意Diane Freis嘅設計風格，已經幫襯咗好多年。當日佢着住嘅靚衫勝在細節設計好有心思，圖案色彩繽紛，所以佢一睇就愛上。Diane Freis時裝店喺香港已立足多年，亦有多間分店，難怪對香港人鍾情傳統及時尚兼備，掌握得咁透徹。
Joise啱啱接任國際華商協進會會長一職，佢話上任後首要任務係擴大會員規模，把握中港台和諧發展嘅契機，積極擴張會務及會員們嘅商機。Joise嘅老爺係有「關島王」之稱嘅福建社團僑領陳守仁，加上有老公陳亨利做私人顧問，相信對佢將來嘅工作如虎添翼。
卓妮