中環出更：發叔山埃貼士 累林鄭輸錢
尋日沙田馬場舉行鄉議局盃，一班鄉紳着晒成套制服，官仔骨骨咁入場湊熱鬧。曾經喺新界村屋僭建問題上，同鄉議局有過過節嘅發展局局長林鄭月娥都有獲邀出席，仲同主席劉皇發同枱食飯，係發叔嘅嘉賓。不過一向對跑馬好有研究嘅發叔，今次竟然老貓燒鬚，累到林鄭輸錢。
林鄭難得入馬場，當然都有入鄉隨俗落吓注玩吓。佢笑笑口咁話，自己唔係好識睇馬，諗住跟發叔買番隻，點知賽果出乎意料，輸得乾乾淨淨，不過好彩佢只係象徵式買咗二十蚊啫。佢話，入得馬場就當然要貢獻吓畀馬會，咪當做善事囉。
同枱食飯冇尷尬
發叔話自己都有落注，雖然買唔中，但眼光只係差少少，都貼中咗第二同第三名。問到今次請林鄭嚟做嘉賓，會唔會覺得尷尬，私底下係咪好老友？發叔就神情輕鬆咁話，「公還公、私還私，大家都係為個社會做事啫！」
卓妮仲喺馬場見到恒生銀行副董事長兼行政總裁梁高美懿及丈夫，跟住又見到渣打香港行政總裁洪丕正，「恒生一姐」同「渣打一哥」前後腳入馬場，時間相差唔夠廿秒，唔知佢哋係咪一早約埋食飯，順便交流吓業界行情？
卓妮