真相大白啊真相大白，唔使出動神探伽俐略，呢鋪終於真相大白嘞！
功夫茶因乜事幹咁興奮呢？無他嘅，當你撥開迷霧見青天，無論真相係幾咁絕望或者殘酷，你都會有一種豁然開朗嘅快感。如果唔係，新聞自由都唔會咁重要啦，而政府餐餐黑箱作業剝削公眾知情權亦都唔會咁討厭。
未講真相之前，先講不解謎團。特首參選人唐英年同新界鄉紳講過，「所謂僭建」涉及歷史特殊性，處理嘅時候要顧及原居民嘅合法權益受到《基本法》保障。言下之意就係暗示，新界丁屋僭建物可以保留，同官方立場截然不同。
本來呢，唐唐發表奇談怪論之謎無法破解，家陣終於水落石出。原來唐唐都係僭建業主，佢老哥想保障新界鄉紳嘅僭建權益，咪就係要保障自己嘅違法行為囉！
傳媒踢爆唐英年任職財政司司長期間，九龍塘住宅涉嫌僭建地庫酒窖，記者曾經向唐唐嘅競選公關公司查詢，當時否認僭建。之不過咁，經過傳媒窮追猛打，唐英年終於鬼拍後尾枕和盤托出，佢話喎，所住嘅九龍塘約道５Ａ單位係有違規僭建物，約道７號係家族物業，佢冇住過，幾個月前記者問佢住嘅單位有冇僭建地庫酒窖，因為佢住嘅單位冇酒窖，所以答冇僭建。佢認為呢個係誤會，現時已經安排合資格人士檢查，如果有違規會盡快糾正。
無論是否誤會，總之一句講晒，唐英年有僭建！
呢嗱嗱嗱，你話係咪真相大白吖？特首又僭建，司長又僭建，局長又僭建，呢一個簡直係無官不違規嘅僭建俱樂部。既然官場動物一個二個知法犯法，處理新界丁屋僭建問題當然係拖泥帶水啦，一拖就拖足幾十年，即使話要依法取締，都會跳出一隻「龍豬物體」從中作梗。
冇錯，真相大白，不過真相係殘酷嘅。喂，吸過毒嘅明星仔都冇資格宣傳禁毒啦，負責執法嘅官老爺居然係違法者，而其中有一個違法者居然有機會被欽點成為未來特區之首，對於冇權選特首嘅香港人而言，殘酷程度直逼滿清十大酷刑。
更加殘酷嘅係唐唐再次發表無厘頭金句，佢話喎，做男人要有膊頭，做公職要有腰骨，有錯必糾正。功夫茶想問，不被踢爆都唔肯認，咁就叫有膊頭？偷雞不成先至糾正，咁就叫有腰骨？原本「唐氏綜合症」嘅意思係語無倫次，家陣病徵應該包括畸畸形形嘅膊頭以及歪歪斜斜嘅腰骨。
計功夫茶話齋，做公職不要僭建，做男人不要狡辯。唐唐既僭建又狡辯，如果真係黃袍加身做特首，睇怕禮賓府都會違規僭建成為一間怪獸屋！