特首參選人唐英年尋日被揭喺九龍塘嘅家族物業違規僭建，並涉嫌刻意隱瞞政府同傳媒。尋日又有熱心讀者來信，質疑唐唐喺政府任職期間多方面濫用公共資源明益自己友，包括每年動用數以十萬元計公款喺官邸請客吃飯，同埋以特區授勳評審委員會主席同非官守太平紳士遴選委員會主席身份，向佢依家嘅競選團隊同支持者大派荷蘭水蓋。
該位讀者翻查資料細數唐唐任內獲授勳嘅唐營人士名單，包括競選辦主任李國寶喺○七年獲頒大紫荊勳章，佢兩個仔李民橋同李民斌亦先後獲頒太平紳士，唐唐競選團隊內嘅高級顧問任志剛，更先後於○九同一○年接連獲頒大紫荊同太平紳士。其他唐營要員如競選辦秘書長何鑄明、「家臣」林大輝等，亦先後獲頒金紫荊、銅紫荊同太平紳士等，認真和味。
其實唐唐主政期間，亦有唔少梁振英（CY）陣營中人同支持者獲政府授勳，其中CY本人亦喺去年獲頒大紫荊，好難證實唐唐真係以權謀私。不過今次事件起碼顯示，唔少市民真係對佢好有意見囉！