政情：黃宜弘倡特權法查西九
特首選舉參選人梁振英突然被翻舊帳，質疑佢喺十年前西九概念設計比賽漏報利益，各路人物連日喊打喊殺揚言追究到底。於是尋日立法會監察西九小組委員會會議就吸引咗一大班好事之徒等睇戲。可惜拗一大輪後都係無料到，令成班等睇戲嘅人一哄而散。
西九小組會議素來得小貓三、四隻，但尋日連平時見首不見尾嘅霍震霆、經濟動力梁劉柔芬、民建聯黃容根、專業會議大舊石石禮謙同埋社福界代表張國柱等委員都有捧場，甚至唔係委員嘅人民力量議員陳偉業、立法會中總代表黃宜弘都嚟埋，認真唔話得。
大舊石同民主黨劉慧卿一嚟就話要傾CY單嘢，黃宜弘仲爆到話政府應該公開晒啲資料畀議員討論，否則佢唔排除用特權法！不過主席葉國謙死都唔制，話小組職權唔包CY單嘢，大舊石同民主黨李永達當然唔肯罷休，繼續據理力爭。
聽埋法律顧問意見，大家就知道死纏落去都無用，大舊石惟有去信內會再跟過，而其他「觀眾」見無料到就鬥快作鳥獸散。