政情：工聯揀特首 吊高嚟賣
始終都係扭計嘅孩子先有大人關注，吊高嚟賣又會矜貴啲。手執六十張選委票嘅工聯會對提名邊位特首參選人，一直提出唔同嘅標準，初時會長鄭耀棠希望睇到有競爭嘅選舉，大家就以為益晒梁振英（CY）。後來棠哥又表明，若然梁振英同唐英年兩位建制派特首選舉參選人唔進一步回應標準工時立法嘅訴求，該會有可能不提名任何一位參選人，「比起曾蔭權所講退後好多，呢個令我哋最不滿。」簡直就係要脅。CY迅速回應，話會盡快約工聯會商討，「睇吓可以去到咩地方」。
嫻姐撐CY KK嗒「唐」
大家唔好忘記，其中工聯會副會長陳婉嫻對CY有好感，幾乎講到出口。不過事情峰迴路轉，工聯會三位立法會議員KK黃國健、王國興同埋葉偉明尋日見完唐英年後，又好似嗒晒糖咁話唐唐贊成標準工時立法，其實唐唐只不過話會整個由勞、資、官同學者組成嘅委員會，參考外國經驗嚟研究，希望當選的話喺任內有「實質進展」。不過KK都要補多句，話未決定提名邊個，又話CY未正式回應標準工時問題，所以唔將兩人比較。
如果真係想搵個支持標準工時嘅參選人，工聯會不妨提名畀民主黨何俊仁啦，事關佢講明撐標準工時㗎嘛，所以一切標準都係掩眼法，要支持邊個，大家落到台就得喇。
工聯會都算玩得叻，六十票一齊走，好過立場分裂晒嘅民建聯，講真作為一個黨，有人支持甲，又有人支持乙，支持嘅力度喺自己內部中和晒，完全唔能夠發揮作用。工聯會就唔同，堅實嘅六十票，CY等佢救命㗎。工聯會個龍門框移咗好幾次，隨着提名日子近在眉睫，今次又有調整，唔通已經好事近？