中環出更：仁愛堂紅衫軍 情人節甜蜜蜜
今日係情人節，大家諗好點樣同另一半慶祝未呢？沙田馬場日前舉行仁愛堂盃，主席蔡黃玲玲好細心，諗到以情人節做主題，一班成員紛紛換上紅色裝束應節。講到慶祝方式，有人豪擦法國大餐，有人於家中煮愛心晚餐，各有各精彩。
濠江歎法菜 屋企煮飯仔
蔡黃玲玲有老公蔡金山與囡囡蔡珍妮（Elina）溫馨撐場，蔡太甜絲絲咁話，佢做主席以來，老公一直都好照顧同支持佢，已經係最好嘅情人節禮物。Elina都加入咗仁愛堂做總理，佢年前喺紐約讀完經濟返港，依家幫媽咪打理投資公司。
副主席陳鄭玉而話，老公飛咗去孟加拉陪朋友睇廠房，不過佢哋早前一口氣去晒英、法、加國度假充電，當提前慶祝。總理張瑋傑好浪漫，一早訂好枱去澳門葡京酒店嘅Robuchon a Galera餐廳歎人氣法國菜，不過佢會提前一日去，因為正日要陪兩位「小情人」，即係兩個寶貝女。
仁愛堂將於四月換屆，副主席黃達東將榮升主席，身兼民建聯深水埗區支部主席嘅佢話，已經增聘經驗豐富嘅職員幫手，希望日後專注仁愛堂工作。同場仲見到前仁濟主席董吳玲玲，佢冧爆咁話，老公係上海人，煮得一手好菜，最叻包餃子，今晚老公會炮製愛心晚餐，過二人世界。
當日有一位貌似名模熊黛林嘅靚女現身，仲獲大會頒發金贊助人獎，原來佢叫嚴碧珊（Ana），將會進身仁愛堂擔任總理。Ana話自己喺美國讀珠寶鑑定，依家喺中環開美容公司，不過佢始終對珠寶興趣大啲，遲啲可能會轉行喎。
卓妮