中環出更：陳國民李文俊齊齊拉頭馬
尋日沙田馬場好熱鬧，皆因「家電大佬」德國寶董事長陳國民嘅愛駒「開心指數」，繼兔年最後一場沙田賽事奪冠後，龍年再以大熱姿態勝出，與親友齊齊開心拉頭馬。
開心指數再爆燈
另一邊廂，理文造紙太子爺李文俊（Raymond）嘅良駒「包裝選擇」亦奪冠，穩袋百幾萬元獎金，李氏一家統統開心到彈起，睇嚟人氣愈旺，贏馬機會都大啲喎！
「開心指數」只有三次出戰經驗，就兩度捧走獎盃，帶挈陳國民袋走近八十萬元獎金，相信佢一定會好似個馬名咁，開心指數滿分。
佢笑笑口話，後日就係西方情人節，呢筆獎金就係最好嘅禮物。問佢情人節點過，佢話當日要返內地應酬，但會帶埋太太去，話唔定到時仲會畀太太一個意外驚喜添，兩夫妻果然如影隨形，恩愛到出晒面。
至於Raymond嘅愛駒「包裝選擇」奪冠，為佢帶來一百三十六萬元獎金，佢太太及爸爸李運強伉儷、胞弟李文斌（Edmond）及胞妹李文慧都戥佢開心。
Raymond話，一早已經訂好枱同太太溫馨撐枱腳歡度情人節，依家贏咗筆獎金，仲可以「雙料」慶祝添。身邊嘅Edmond忽然「哎吔」大叫一聲，原來佢因為公務太過繁忙，醒唔起後日就係情人節，但佢話會即刻買番份禮物氹太太開心，真係廿四孝老公。
卓妮