其實「民主阿婆」前日出席亞洲協會活動時，已經被在場記者追問特首參選人梁振英被指涉及西九利益衝突事件，民主阿婆當時懶矜持咁冇回應事件。
不過，佢尋日態度突然一百八十度轉變，接受個別傳媒訪問時首度開腔評論事件，質疑點解政府當年唔揭發及交代呢件事，認為政府對任何特首候選人都應該保持中立，避免畀市民錯覺政府有偏幫喎。
話時話，民主阿婆早前同傳媒茶敍時，暗挺唐踩梁嘅態度已是路人皆見，今次佢又好似塘邊鶴咁叫政府保持中立，一係可能佢覺得煲呔曾同政府喺呢件事件上做得太過分，一係佢太過不甘寂寞，嫌煙硝四起嘅特首選戰唔夠亂，但鐵一般嘅事實係，民主阿婆每次出現都唔慌有乜好事發生。