中環出更：家有喜事 彤叔下月嫁孫女
今年龍年雙春兼閏月，又係嫁娶嘅好年份。城中富豪新世界集團主席鄭裕彤家族將搶閘辦喜事，彤叔長子鄭家純嘅囡囡鄭志雯（Sonia）下月十一日將下嫁鋼鐵大王龐鼎元孫仔龐建貽（Paulo），喺灣仔會展大排筵席。家有喜事嘅彤叔心情靚絕，前日喺兩名助手陪伴下慢巡中環，期間笑容滿面，氣色好好，添個孫女婿認真開心。
好好笑容 有問必答
前日下午約五時，彤叔一行人喺中建大廈行出嚟，呢排天氣寒冷，彤叔好識保暖，着咗兩件羽絨、腳踩至愛嘅波鞋，期間雙手放喺背後，狀甚輕鬆。卓妮上前同佢打招呼，佢好好笑容，有問必答，話過年期間去咗大陸玩幾日，問佢支持邊位特首參選人，佢就話要睇吓政綱先。然後施施然行返去皇后大道中新世界大廈嘅大本營。
講起呢件大富之家嘅聯婚之喜，一對新人都喺事業上做出一番成績。今年三十一歲嘅Sonia，係新世界酒店集團主席，佢畢業於哈佛大學，返家族幫手冇耐就成為集團酒店事業嘅揸弗人，甚得祖父及爸爸認同。至於新郎哥Paulo就自創紅酒生意，名下嘅大亞國際集團係本港最大嘅頂級葡萄酒入口商之一，亦舉辦過紅酒慈善宴，唔知係咪全憑一顆愛心，娶得美人歸？